Шрифт

2 декабря

Канон святаго мученика Варлаама.

Святаго мученика Варлаама
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь му́ченика, гла́с 4:

Му́ченик Тво́й, Го́споди, Варлаа́м во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н му́ченика. Гла́с 4.

Пе́снь 1.

Ирмо́с: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Припев: Святый мучениче Варлааме, моли Бога о нас.

Твоего́ страда́ния светлостьми́ озаря́емь, на́с, ве́рою чту́щих па́мять твою́, соблюди́, Варлаа́ме, моли́твами твои́ми.

Припев: Святый мучениче Варлааме, моли Бога о нас.

Огнь угаси́вый нече́стия богоче́стия изве́стно огне́м богодохнове́нным, да почти́тся песнопе́сньми Варлаа́м чу́дный.

Припев: Святый мучениче Варлааме, моли Бога о нас.

О благоче́стии подвиза́вся, венчено́сче Варлаа́ме, венце́м сла́вы ны́не досто́йно почествова́лся еси́ десни́цею Вседержи́телевою.

Сла́ва Отцу́ и Сы́ну и Свято́му Ду́ху:

Кре́пость тебе́ дарова́ Влады́ка на разли́чныя ра́ны, всеблаже́нне му́чениче, сего́ ра́ди победи́л еси́ безбо́жных свире́пство.

И ны́не и при́сно и во ве́ки веко́в. Ами́нь.

Богоро́дичен: Ле́ствица яви́лася еси́ небе́сная, е́юже сни́де к на́м Сло́во, Де́во, ю́же дре́вле прови́де Иа́ков, пра́отец Тво́й.

Пе́снь 3.

Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Святый мучениче Варлааме, моли Бога о нас.

Ве́сь пло́тский сою́з и сочета́ние твои́х удо́в разреша́теся, но кре́пость соблюде́ся твоея́ души́ нерасте́рзана.

Припев: Святый мучениче Варлааме, моли Бога о нас.

Стремле́ние благомо́щно претерпе́л еси́, стру́жущих твоя́ ре́бра, всеблаже́нне, терпе́ние ю́ношеское кре́пко показа́в.

Сла́ва Отцу́ и Сы́ну и Свято́му Ду́ху:

Кто́ твое́ кре́пкое и си́льное и по́мысла неужа́сное мудрова́ние похвала́ми похва́лит по досто́инству, всеблаже́нне?

И ны́не и при́сно и во ве́ки веко́в. Ами́нь.

Богоро́дичен: Уста́вися тля́ сме́рти во Ипоста́сной пло́тию Жи́зни, Пречи́стая, челове́ком я́вльшейся из чре́ва Твоего́, Богоневе́стная.

Седа́лен му́ченика, гла́с 4. Подо́бен: Вознесы́йся.

Пла́мень нече́стия угаси́в и росо́ю богозна́ния вже́гл ве́рных сердца́, ны́не да почти́тся ве́рно Варлаа́м сла́вный пе́сньми боже́ственными. Се́й бо посрами́ и́дольскую ле́сть и, побе́дный вене́ц взе́м, все́м про́сит грехо́в оставле́ния.

Сла́ва, И ны́не, Богоро́дичен:

Иже на престо́ле херуви́мстем седя́й, и в не́дрех Отчих пребыва́яй, я́ко на престо́ле святе́м седи́т Свое́м, Влады́чице, в не́дрех Твои́х; вопло́щься бо, Бо́г вои́стинну, воцари́ся над все́ми язы́ки, и разу́мно ны́не пои́м Ему́. Его́же умоли́ спасти́ся рабо́м Твои́м.

Пе́снь 4.

Ирмо́с: Твоего́ на земли́ явле́ния, Христе́ Бо́же, пропове́дуя проро́к прише́ствие, с весе́лием вопия́ше: сла́ва си́ле Твое́й, Го́споди.

Припев: Святый мучениче Варлааме, моли Бога о нас.

Вити́йское скверносло́вие отри́нув, уче́ние же апо́стольское прие́м и́стинное, сла́вне, свиде́тель и́стинный бы́л еси́.

Припев: Святый мучениче Варлааме, моли Бога о нас.

Иже огня́ си́льнейшее произволе́ние свяжа́в, мучи́телей безу́мие низложи́в, зове́ши: сла́ва си́ле Твое́й, Го́споди.

Припев: Святый мучениче Варлааме, моли Бога о нас.

О Христе́ да́же до сме́рти, терпеливоду́шне, огню́ и му́кам проти́вился еси́, велегла́сно поя́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Си́льнейшим преусе́рдием, всеблаже́нне, обдержи́мь, пре́лесть попра́л еси́ богому́дренно, поя́: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: Вопло́щся от Де́вы, Безпло́тный на зе́млю к челове́ком прии́де. Те́мже ве́рою зове́м: сла́ва си́ле Твое́й, Го́споди.

Пе́снь 5

Ирмо́с: Возсия́вый све́т, и просвети́вый у́тро, и показа́вый де́нь, сла́ва Тебе́, сла́ва Тебе́, Иису́се, Сы́не Бо́жий.

Припев: Святый мучениче Варлааме, моли Бога о нас.

Показа́вый на́м Свои́х страсте́й свиде́теля, вопию́ща: сла́ва Тебе́, сла́ва Тебе́, Иису́се, Сы́не Бо́жий.

Припев: Святый мучениче Варлааме, моли Бога о нас.

Терпе́нию твоему́ мно́гому мзда́ и побе́ды вене́ц исплете́ся, — сла́ва Тебе́, сла́ва Тебе́, — зову́щу, — Иису́се, Сы́не Бо́жий.

Сла́ва Отцу́ и Сы́ну и Свято́му Ду́ху:

Стре́лы глаго́л твои́х в сердца́ вра́жия вонзи́л еси́, зовы́й: сла́ва Тебе́, сла́ва Тебе́, Иису́се, Сы́не Бо́жий.

И ны́не и при́сно и во ве́ки веко́в. Ами́нь.

Богоро́дичен: Святу́ю го́ру, Чи́стая, и я́ко ски́нию Высоча́йшаго му́дрствующе Тя́, Де́во, — сла́ва Тебе́, — зове́м, — Богоро́дице, на́ше упова́ние.

Пе́снь 6.

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Святый мучениче Варлааме, моли Бога о нас.

Да бию́тся десни́цею разжже́нною ли́ца де́монская, сердца́ же ве́рных да взыгра́ются и безпло́тных ли́цы све́тло да веселя́тся.

Припев: Святый мучениче Варлааме, моли Бога о нас.

Украша́ются до́брых твои́х по́двиг побе́ды и одоле́ния, и страда́льческая зря́щих натрижне́ния, перворожде́нных избра́нное и светоно́сное торжество́.

Сла́ва Отцу́ и Сы́ну и Свято́му Ду́ху:

Воста́ните, до́брии ны́не живопи́сцы, му́ченика о́браз ва́шими благохи́тростьми украси́те, подвигополо́жника я́вственно в не́м начерта́юще.

И ны́не и при́сно и во ве́ки веко́в. Ами́нь.

Богоро́дичен: Весели́тся о Тебе́, Богома́ти Всепе́тая, прама́ти, дре́вния кля́твы Рождество́м Твои́м изба́вльшися и сме́ртнаго го́рькаго осужде́ния.

Конда́к му́ченика, гла́с 4. Подо́бен: Яви́лся еси́.

Яви́лся еси́, преудивле́н кре́постию всесожже́ния, лива́н благово́нен, себе́ прине́сл еси́ же́ртву Христу́, и, вене́ц по́чести прии́м, Варлаа́ме, при́сно моли́ за ны́, страда́льче.

Пе́снь 7.

Ирмо́с: Оте́ц на́ших Бо́же, не посрами́ на́с, но да́руй на́м со дерзнове́нием вопи́ти Тебе́: благослове́н еси́, Бо́же оте́ц на́ших.

Припев: Святый мучениче Варлааме, моли Бога о нас.

С му́ченическими ли́ки, я́ко непобеди́мь му́ченик, сподо́бился еси́ Христу́ велегла́сно зва́ти: благослове́н Бо́г оте́ц на́ших.

Припев: Святый мучениче Варлааме, моли Бога о нас.

Со свеща́ми све́тлыми в Боже́ственный черто́г вше́л еси́, Христу́, великому́чениче, зовя́: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Крепча́йшу огня́ десни́цу стяжа́в, предста́тель десны́й твоему́ Влады́це, зове́ши: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Изба́вленнии Твои́м Пречи́стым Рождество́м, пое́м Тя́, ве́рнии, непреста́нно зову́ще: благослове́н, Пречи́стая, Пло́д чре́ва Твоего́.

Пе́снь 8.

Ирмо́с: Вся́ дела́ Бо́жия и вся́ тва́рь, благослови́те Го́спода, я́ко челове́ком от земли́ возсия́ Све́т, и вселе́нную всю́ просвети́, и жи́знь ве́чную ми́ру дарова́, по́йте, лю́дие, и превозноси́те Его́ во ве́ки.

Припев: Святый мучениче Варлааме, моли Бога о нас.

Все́ низложи́л еси́ вра́жие всеору́жие, Варлаа́ме достосла́вне, попали́л еси́ и́дольскую ле́сть, зовы́й: Тя́ превозно́сим, Христе́, во ве́ки.

Припев: Святый мучениче Варлааме, моли Бога о нас.

Укра́шен благоле́пно, Христу́ предста́л еси́, страда́льче приснопа́мятне, кро́вию му́ченическою очервле́ну нося́ багряни́цу и Влады́ку поя́ во ве́ки.

Сла́ва Отцу́ и Сы́ну и Свято́му Ду́ху:

Благоче́стия огне́м разжже́н, я́ко те́рние, попали́л еси́ вся́ де́монская мечта́ния, зовы́й: Тя́ превозно́сим, Христе́, во ве́ки.

И ны́не и при́сно и во ве́ки веко́в. Ами́нь.

Богоро́дичен: Благословя́щии Тя́ ве́рно от Го́спода благословля́ются, Всенепоро́чная: ражда́еши бо благословя́щаго тва́рь Влады́ку, Его́же превозно́сим, Чи́стая, во вся́ ве́ки.

Песнь 9

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святый мучениче Варлааме, моли Бога о нас.

Зако́н похвале́ний побежда́ется подвиго́в твои́х вели́чеством, еди́н Влады́ка Христо́с тя́ сла́вити ве́сть Боже́ственною све́тлостию: Его́же приле́жно моли́ о ве́рою воспева́ющих тя́.

Припев: Святый мучениче Варлааме, моли Бога о нас.

Всего́ тебе́ сама́го Го́споду же́ртву жи́ву прине́сл, ве́сь Того́ Ца́рствия сонасле́дник яви́лся еси́ и прича́стник, и с Ни́м, ра́дуяся, ны́не ца́рствуеши, приснопа́мятне.

Сла́ва Отцу́ и Сы́ну и Свято́му Ду́ху:

За Твою́, Спа́се, любо́вь кро́вию да́же и до сме́рти, мечу́, и огню́, и му́кам боже́ственный му́ченик противоополчи́вся, е́же у Тебе́, Человеколю́бче, безсме́ртие прие́м, наслажда́ется.

И ны́не и при́сно и во ве́ки веко́в. Ами́нь.

Богоро́дичен: Тя́, Засту́пницу ми́ра и Богома́терь Де́ву, всея́ жи́зни моея́ предста́тельницу и спасе́ние, ра́дуяся, предлага́ю: Ты́ бо, Бо́га ро́ждшая, спаса́ти мо́жеши пою́щия Тя́.

Молитва

О святы́й уго́дниче Бо́жий, му́чениче Варлааме! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святаго мученика Варлаама